Қазақстан Еуропалық одақтың ірі сауда серіктестерінің 30 елінің қатарына енді, деп мәлімдеді бүгін ҚР Парламенті Сенатының жалпы отырысында ҚР сыртқы істер министрі Ерлан Ыдырысов. Бұл туралы zakon.kz, primeminister.kz жариялаған ақпаратқа сүйеніп хабарлайды.
«Қазақстан ЕО 30 ірі сауда серіктесінің қатарына еніп, ЕО тауар айналымының жалпы көлемі бойынша 26 орынды иеленді», - деді Е.Ыдырысов.
Оған қоса, бүгінгі таңда ЕО Қазақстанның ең ірі сауда серіктестері мен инвесторларының бірі болып табылады. Осылайша, тауар айналымының 50% және Қазақстанның тартылған шетел инвестицияларының 50%-дан астамы Еуропа елдерінің үлесіне тиесілі.
Министр Қазақстан Республикасы мен Еуропалық одақ арасындағы кеңейтілген серіктестік пен ынтымақтастық туралы Келісімді ратификациялау қазақстандық әуе компанияларын ЕО-тың қара тізімінен шығаруға мүмкіндік беретініне сенім білдірді.
«Ережелерге сәйкес Келісімді жүзеге асыру екі жақтың күн тәртібінде ұзақ уақыт бойы шешімін таппаған мәселелердің жылжуына серпін береді. Бұл ҚР азаматтары үшін виза режимін жеңілдету, Қазақстанға нарықтық экономикасы бар ел мәртебесін беру», -деп түсіндірді ол.
Фото: kaz.caravan.kz
