Қарағанды облысында металл сынықтарын жинап жүрген үш адам кәріздің буына уланып қаза тапты. Бұл туралы ҚазАқпарат, өңірдің ТЖД баспасөз қызметі таратқан ақпаратқа сілтеме беріп хабарлады.
Ведомствоның ақпаратына сәйкес жазатайым оқиға Абай ауданының Южный кентінде істен шыққан тазалау құрылғысы аумағында орын алды.
«Төрт ер адам металл қалдықтарын жинау үшін кәріз құдығына түскен. Қордаланып қалған газдан уланған үшеуі оқиға орнында көз жұмды. Біреуі құдықтан өзі шыққан. Қазір ол Топар кентіндегі орталық ауруханада жатыр», - делінген хабарламада.
Полиция қаза тапқандардың мүрдесін 14 сәуірде кешке 5 метр терең құдықтан алып шықты. Қаза тапқандардың жасы 28-33 аралығында
Тергеу жүргізілуде.
Фото: inform.kz
