Алматы әкімі Бауыржан Байбек «Маунт Синай» халықаралық медициналық желісінің өкілдерімен кездесті. Екіжақты жүздесу барысында Алматыда халықаралық деңгейдегі емхананың пайда болу мүмкіндігі талқыланды, деп хабарлайды ҚазАқпарат.
Емханада әйел денсаулығы орталығы, онкологиялық, ортопедиялық, диагностикалық орталықтар ашылады. Медициналық мекеме жеке инвесторлардың қаржысына салынбақ. Мамандардың айтуынша, халықаралық нысан медициналық туризмді дамытуға өз ықпалын тигізеді.
Айта кету керек, денсаулық сақтау саласының дамуы - «Алматы-2020» даму бағдарламасындағы басым бағыттардың бірі. Қаладағы денсаулық сақтау саласының деңгейі бірнеше сатыға өсті.
Республикалық денсаулық сақтау саласын дамыту орталығының рейтингісіне сәйкес, Алматы қазір 16-орыннан 2-орынға көтерілді.
Соңғы екі жылда ана мен бала өлімі көрсеткіші айтарлықтай төмендеді.
Елдегі 35 жетекші емхананың 29-ы Алматыда орналасқан.
Гүлмира Ғосманәли
Фото:millennium.kz
