Жетісулық түлектер өміріндегі ең маңызды сынаққа – Ұлттық бірыңғай тестілеуге дайындалып жатыр. Оқушылардың он бір жылдық білімін тексеретін тест арнайы жабдықталған 15 пункте өтеді, деп хабарлайды BNews.kz.
«Оның 14-і аудандық және қалалық жалпы білім беру мектептерінде орналасқан. Біреуі – Талдықорғандағы Жетісу мемлекеттік университетінде. Барлық пункте мемлекеттік комиссия құрылған, ҰБТ-ны өткізу үшін қолайлы жағдай жасалуда. Тест өтетін орындардың барлығы қажетті жабдық және аппаратурамен жабдықталды, ал мамандар тиісті нұсқаудан өтті», - деп атап өтті облыстық білім басқармасының басшысы Л.Базарқұлова.
Биыл өңірде 13 мыңнан аса түлек мектепті тәмамдайды. ҰБТ-ға қатысуға әзірге 9056 оқушы өтініш берді, бұл пайыздық қатынаста алғанда түлектердің жалпы санының 67,9 пайызы.
Естеріңізге салып өтсек, биыл білім саласына жаңашылдық енгізілді – шекті 50 балдық межеден өте алмаған түлектер тесті екінші рет тапсыра алады. Қайта тапсыру құны – 2242 теңге.
Фото:mazhab.kz