Облыс әкімі Жансейіт Түймебаев түркиялық «Эксперт пейзаж» компаниясының жетекшісі Билал Тарик Дедемен кездесті. Басқосуға облыс әкімінің орынбасары С.Тұяқбаев пен аталған түрік компаниясының өкілі Алабажак Чинан қатысты. Бұл туралы zakon.kz ОҚО әкімінің баспасөз қызметі берген ақпаратқа сілтеме жасап хабарлайды.
Екеуара әңгімеде тараптар бауырлас елдердің түрлі салалардағы ынтымақтастық жұмыстарын сөз етіп, алдағы уақытта да бұл үрдістен жаңылмауға уағдаласты. Оңтүстік Қазақстан облысының инвестициялық әлеуетімен танысқан қонақтар облыс жетекшілігіне абаттандыру жұмыстарымен айналысатын «Эксперт пейзаж» компаниясының ландшафтты дизайн қызметін ұсынды.
Өз кезегінде, өңір басшысы аталған ұсынысты оң қабылдап, компанияның қызметін облыстағы көріктендіру жұмыстарына пайдалану үшін облыстық сәулет және қала құрылысы басқармасы мен облыстық кәсіпкерлік, индустриалды-инновациялық даму және туризм басқармасына туризмді дамыту бағыты бойынша тиісті ұсыныс енгізуді жүктеді.
Оған қоса, облыстың туризм, көлік-логистика мен инфрақұрылым және инвестициялық ахуалы жайлы маңызды ақпараттардан құлағдар болды. 3 күнге жоспарланған сапар аясында түрік кәсіпкерлері «Оңтүстік» арнайы экономикалық аймақты аралап жергілікті өнім өндірушілермен кездеседі. Айта кетейік, «Эксперт пейзаж» компаниясы Түркияның Анталия қаласындағы абаттандыру жұмыстарының 40 пайызын жасап келе жатқан белді серіктестік.
Фото: ontustik.gov.kz
