Қазақстан туралы арнайы қосымша тек отандастырымызды ғана емес, шетелдіктерді де тәнті етуде. Қолданысқа берілгелі оны 5 мыңнан астам адам телефондарына жүктепті, деп жазады Алматы телеарнасы.
Ал, Ішкі істер министрлігінің сайтынан 15 мыңнан астам адам қараған. «Қазақстан - Ұлы дала елі» қосымшасы еліміз туралы мағлұмат беретін нағыз энциклопедия. Мұнда география, тарих, мәдениет, экономика, туризм және халықаралық қатынастар сияқты кең ауқымды тақырыптар қамтылған. Арнайы қосымша Қазақстанға іскерлік мақсатпен келуді жоспарлайтын шет ел азаматтары үшін, сондай-ақ туристер, студенттер, зерттеушілер, журналистер мен іскерлік топтардың өкілдері үшін таптырмас құрал. Тұтынушылар пайдалы ақпараттарды қазақ, орыс және ағылшын тілдерінде оқи алады.
«Арнайы қосымшаның көлемі өте үлкен, шамамен 1 гегабайтты алады. Дегенмен, мұнда Қазақстан туралы барлық маңызды ақпараттар жинақталған. Тас дәуірінен басталған қатпарлы тарих, қазақ мәдениеті, өнері, тарихи тұлғалары мен жеткен жетістіктері туралы мәліметтер қамтылды. Қосымша жоғары сападағы әртүрлі фотосуреттер мен 3Д картамен безендірілген», - деді «Қазақстанның ғаламтор қауымдастығының» жетекшісі Шавкат Сабиров.
Фото: www.almaty.tv
