«Қазгидрометтің» хабарлауынша, қаңтардың 4-6 аралығында елордада жел соғып, қар мен бұрқасын болады. Бүгін Астанада күн бұлтты, аздап қар жауады, деп жазады Хабар 24 арнасы.
Ауа температурасы 0...-2°С, түнде -4...-6°С. Таңертеңнен бері оңтүстік-батыстан соққан желдің екпіні кейде 20 м/с жетіп, ертең де сақталады. Бұл туралы Астана әкімдігінің сайты хабарлады. 5 қаңтарда көшпелі бұлт шығып, оқтын-оқтын қар жауады, сырғыма боран соғады. Термометр бағаны күндіз -4...-6°С, түнде -6...-8°С көрсетеді.
Арғы күні де аздап қар жауып, жел тұрады. Ауа температурасы күндіз -8...-10°С, түнде -12...-14°С. Ауа райының бұзылуына байланысты елордада бүгін таңертең қар жинау жұмыстарының қарқыны күшейтілді. «Астана Тазалық» ЖШС-інен 376 арнайы техника көшеге шықты, 245 жол жұмыскері санитарлық тазарту жұмыстарына тартылды.
2016 жылдың 13 қазанынан 2017 жылдың 3 қаңтарына дейін қала аумағынан 1 861 151 текше метр қар шығарылды. Осы кезеңде көктайғақпен күресте 21 176 текше метр құм-тұз қоспасы және 1 118,35 тонна «Айсмелт» реагенті себілді.
Фото: 24.kz
