Павлодар облысында өткен жексенбі күні төтеншеліктер қар құрсауында қалып қойған 15 көлік пен 76 жолаушыны құтқарды, деп хабарлайды pavlodarnews.kz.
Бұл туралы облыстық ТЖД бірыңғай кезекшілік қызметі басқармасының басшысы Асқарбек Омаров мәлім етті.
- Түнгі уақытта Екібастұз тас жолынан 20 шақырым қашықтықта Бәйет ауылының жанында Астанаға бет алған 15 көлік тұрып қалған. Оның үшеуі - автобус, екеуі - жүк көлігі және 10-ы - жеңіл көлік. Сондай-ақ, Қалқаман ауылынан 25 шақырым қашықтықта Қалқаман-Баянауыл тас жолында қалып қойған Nissan және КамАЗ көлігінен төрт адам құтқарылды. Оның үшеуі ересектер болса, біреуі - бала. Екі адам Екібастұз қаласының ауруханасына жатқызылған, - деді Асқарбек Омаров.
Бұдан басқа, Парамоновка ауылының жанында Қызылорда-Павлодар тас жолында Volkswagen, Fores және Audi маркалы автокөліктерінің соқтысуы салдарынан жол апаты тіркелген. Оқиға орнында жеңіл жарақат алған үш адамға медициналық көмек көрсетілді.
Ақбота Сейсенбаева
Фото: Рavlodarnews.kz
