Қызылорданың коммуналдық-тұрмыстық нысандарын тексеру барысында сауда үйлердің бірінде қабырғаның ішіне жасырып тартылған газ құбыры анықталды. Осылайша, «Өтемұратов С.» жеке кәсіпкерлігі табиғи отынды ұрлап келген, деп жазады ҚазАқпарат ХАА.
«ҚазТрансГаз Аймақ» АҚ қызметкерлері екі «Премиум-50» газ қазандығының газ жүйесіне заңсыз қосылғанын, соның салдарынан 100 мың текше метр көгілдір отынның заңсыз жағылып, 2 миллион теңге көлемінде шығын келгенін анықтады. Олар ішкі істер департаменті қызметкерлерімен бірлесе отырып, іске байланысты хаттамалар толтырып, фото және бейне жазбалар түсірді.
Енді олар Қазақстан Респуликасы заңнамасына сай жауап беріп, айыппұлдар төлейтін болады. Айта кетейік, дәл осындай жағдай Қызылордада бірнеше ай бұрын анықталып, үлкен шу туғызған болатын. Ол кезде қаланың ортасында орналасқан «Караван сарай» қонақ үйлер кешенінің иесі газ есептегіштегі пломбаны бұзып көрсеткішті төмендеткен.
Заңды түрде салынған айыппұлдарға қарамастан кешен иесі бәрін жоққа шығарып, «ҚазТрансГаз Аймақ» АҚ қызметкерлеріне қоқан-лоқы да жасаған еді. Өткен жылы Қызылорда қаласында газ пайдаланудағы заң бұзушылыққа жол берген оқиғалардың 86 фактісі анықталды.
Фото: www.inform.kz
