Ақтауда жүгіруге шыққан жасөспірімді зорлап кетті, деп хабарлайды Baq.kz ақпарат агенттігі lada.kz-ке сілтеме жасап.
Ақтау тұрғыны кәмелеттік жасқа толмаған қызды зорлады деп айыпталды. Күдікті уақытша ұстау абақтысына қамалды. Қазіргі таңда сот-медициналық сараптамасы тағайындалды.
Маңғыстау облыстық ІІД баспасөз қызметінің хабарлауынша, оқиға 5 тамызда, сенбі күні болған.
Ақтау қаласындағы 5А ықшам ауданындағы аттракцион паркі қызметкерлерінің айтуынша, жәбірленген қыз таңертең жүгіруге шыққан. Оның құлағында құлаққап болған.
«Оны ер азамат аңдып жүрген. Кейін қызды жағалауда демалушылар ес-түссіз жатқан күйінде тауып алды», - дейді парк қызметкерлері.
Күдіктіні Ақтау қаласының полиция қызметкерлері тұтқындаған.
«Күдіктіге қатысты Қылмыстық кодекстің 121 бабы бойынша (Сексуалдық сипаттағы зорлық-зомбылық әрекеттері, кәмелеттік жасқа толмаған адамға қатысты) сотқа дейінгі тергеу жұмыстары жүргізілуде. Қазіргі таңда сот-медициналық сараптамасы тағайындалды. Күдікті Ақтау қаласының Ішкі істер басқармасындағы уақытша ұстау абақтысына қамалды», - деді облыстық ІІД-нің баспасөз қызметі.
Егер күдіктінің айыбы дәлелденсе, ол 10 жылдан 15 жылға дейін бас бостандығынан айырылуы мүмкін.
Еске сала кетсек, 26 шілдеде Қостанай облысында 50 жастағы әйелді таксиде зорлап кеткен болатын.
Фото: Baq.kz
