Теңгенің құнсыздануы отандық туризмді дамытуға оң ықпал етті

Zakon.kz

Ел азаматтары отандық туризмді дамытуға ден қоя бастады. Соңғы екі жылдың ішінде көрсеткіш 21 пайызға артқан.

Ал, шетелді құмартатындар саны керісінше 70 пайызға қысқарыпты. Көк қағаздың шарықтауы да тұрғындардың тынығатын орындарды тиімді таңдауына әсер еткен,-деп хабарлайды Алматы телеарнасы.

Алматының мақтанышы – Іле-Алатау табиғи қорығы мен «Шымбұлақ» тау-шаңғы демалыс орны. 7000 демалушыға арналған курортқа 2014 жылы бір күнде 7500 турист келсе, биылғы қыста бір күнде келген демалушылар саны 10 мыңнан асқан. Ұлттық валютаның құнсыздануы Шымбұлақтың ақысына әсер етпепті.

«Жастар тарифы бар. Зейнеткерлерге арналған көптеген жеңілдіктер бар. Зейнкерлерге тегін болады. Яғни, 65 жастан асқандар кез келген уақытта жұмыс күндері тегін абономент ала алады немесе студент болсаңыз, 2500 теңгеге сатып алуға болады»,- деді "Шымбұлақ" тау-шаңғы курортының маркетинг менеджері Сая Оқас.

2014 жылдан бері шет елге барып демалатын отандастардың саны қысқарған. Жат жұрттағы демалыс орындарын жақсы көретіндердің қатары екі жылда 70 пайызға азайыпты. Әдетте маусым сайын жолдамасы тапшы болатын чартерлік рейстер де тоқтаған.

«Туристік бағдарламалар жылда көтеріліп жататын. Қыстық, жаздық деген сияқты. Былтырды алатын болсақ, чартерлік бағдарламалардың көбі жабылды. Бір, екі ғана бағыт қалды. Олар да кейін жабылып, күнделікті ұшатын ұшақтар ғана ұшып жатыр»,- деді ҚТҚ директорының орынбасары Шакира Әділбекова.

Отандық демалыс орындарына көшудің уақыты жетті. Бағасы қолжетімді, жолға уақыт шығындалмайды. Оған теңгенің құнсыздануы мен экономикалық дағдарысты қосыңыз. Дегенмен елдегі демалыс орындарының босаңсуына әлі ерте. Өйткені түзететін кемшін тұстар жетіп артылады. Бұл ең алдымен қызмет сапасына байланысты. Шетелдік курорттардың қызмет көрсетуі жақсы. Біздің қазақтар кішкене ойланады. Ештеңе әкелмейді. Оларға айту керек. Адамдар Ыстықкөлге барып жатады. Өйткені, сол жақта маусымға байланысты арзандау болады деп жатады. Әрине, басқа елдермен салыстырғанда Қазақстанның өз ішінде демалсаң, тиімдірек шығады. Алакөлде, Балқашта, өзіміздің қазақтың жерінде демалғанды жақсы көремін. Өйткені көп елде болдым. Өз жеріңдегі демалыс орындарына жетпейді бәрібір.

Статистиканы сөйлетсек, соңғы 2 жылда отандық демалыс орындарына келушілер саны 21 пайызға көтеріліпті. Демалушылардың көбі табиғи бақтар мен ұлттық қорықтарға барғанды жөн көреді екен.

Аршын Кемелжан, Влад Шишко

Фотосурет: www.thenews.kz