Алматылық төтеншеліктер сел жүру қаупінің алдын-алу шараларын бастады
Zakon.kz
Күн райының жылуына байланысты төтеншеліктер мен Алматы қаласы аудан әкімдіктері біріге сел жүру қаупінің алдын-алу шараларын қолға алды. Өзен арналарын мұз бен күл-қоқыстардан арылта бастады, деп хабарлайды Алматы телеарнасы.
"Су тасқыны жүретін аймақтары бар қаланың аумағында орналасқан өзендер мен көлдерде. Олар шағын болып табылады. Медеу мен Жетісу ауданында осы өзендердің арнасында жиналған мұздарды тазартып, күл-қоқыстарды тазартып, таудан аққан суды бөгелмей өтуін қарастырып жатырмыз",- деді Алматы қ. ТЖД Азаматтық қорғаныс басқармасы басшысының міндетін атқарушы Бейбіт Еңсебаев.
Қаупі жоғары аймақтардың бірі - Талғар тас жолында орналасқан Тіксай өзені. Мамандардың көмегімен бұл жерден 20 текше метр қар күрелді.Тазарту жұмыстары Құлжа тас жолына дейін жалғасатын болады.
"Су басу қаупін болдырмау үшін тазалау жұмыстарын ұйымдастырдық. Атап айтатын болсақ, 6 ақпан күні Медеу ауданы әкімі аппаратының коммуналдық бөлімі мұздардан тазартты. Бүгін жалғастырып жатырмыз",- деді Алматы қ. Медеу ауданы ТЖД бөлімінің бас маманы Қасымбек Мұшанов.
Аталмыш іс-шараға Медеу ауданы коммуналдық қызметінен 2 техника, 8 жұмыс күші жұмылдырылды. Сонымен қатар, қаланың құтқару қызметінен 4 техника мен 15 адам тартылған.
Бұдан бөлек, Төтенше жағдайлар департаментінің қызметкерлері Тіксай өзеніне жақын орналасқан тұрғындарға ескертпе қағаздарын таратты. Өзеннің арнасын, жағасын күл-қоқыстардан таза ұстау туралы түсіндірме жұмыстарын жүргізді.
Азамат Әуезхан, Әрсен Сандыбаев
Фотосурет: mgorod.kz
