Германиядан келген сәлемдемеден есірткі шықты
Zakon.kz
Алматы қаласы бойынша Мемлекеттік кірістер департаментінің «Жетісу» кеден бекетінің халықаралық пошталық жөнелтілім бөлімінің қызметкерлері иісшіл ит және тексеру құрылғысының көмегімен бір қораптан ұнтақ тәрізді затты тауып алды, деп хабарлайды ҚазАқпарат.
Мекеменің ресми сайтында хабарланғандай, физика-химиялық сараптама жүргізу барысында қорапта салмағы 20 келілік күшті әсер ететін - фенциклидин (қысқаша РСР) есірткісі табылған.
Фенциклидин - синтетикалық фармакологиялық препарат. Ұйықтату, күре тамырға салынатын наркоз ретінде пайдаланылады. Фенциклидинді пайдалану психикаға әсер етеді: дел-салдық, өмірден түңілу сезімдері пайда болады. Фенциклидиннің әсер етуі 2 сағаттан 24 сағатқа дейін жетеді.
Қазіргі таңда әлемде бұл затты өндіруге үзілді-кесілді тыйым салынған. РСР заңсыз айналымға 1967 жылы шығарылған. Оның сондай-ақ Peace pill, періште шаңы (Angel dust), HOG, Killer weed, KJ, Embalming fluid, Rocker fuel, Sherms секілді «көшелік» атаулары бар.
«Бұл халықаралық пошта жөнелтілімі Германиядан транзитпен Алматы арқылы Бішкекке бағытталған болатын. Алдын ала болжам бойынша бұл тауар бүкіл Еуразиялық экономикалық одақ елдеріне таратуға арналған.
2016 жылдың басынан бері Алматы қаласында ішінде есірткі-психотроптық заттар бар деген күдікпен (ұнтақтар, сұйықтықтар) 12 сәлемдеме тәркіленіп, берілді, - делінген хабарламада.
Жаппарберген Айбота
Фото: ria.ru
