Шарбақтылық кәсіпкердің саңырауқұлақтарына Славгород қаласынан тапсырыс түсуде
Zakon.kz
Шарбақты ауданының кәсіпкері Николай Белоусов Ресей елінің Славгород қаласында орналасқан «Оля» дәмханасын айына 280 келі саңырауқұлақпен қамтамасыз етеді, деп хабарлайды pavlodarnews.kz.
Бұл туралы агенттікке аудандық жұмыспен қамту және әлеуметтік бағдарламалар бөлімінің маманы Екатерина Терещенко мәлім етті.
«Николай Белоусов бір миллион теңгеге Қытай елінен дайын саңырауқұлақ блогын, қоспалауыш, ағаш өңдейтін білдек, мицелий, полиэтилен қаптары мен "Енисей" жабдығын сатып алған. Ғимаратта 96 саңырауқұлақ блогы орналасқан. Әрбір блоктан ай сайын үш келі өнім алынады. Келісі 800 теңгеден саудаланатын саңырауқұлақ бір айдың ішінде тауарлық күйге келеді, - дейді Е. Терещенко.
Еске сала кетейік, Николай Белоусов 2014 жылдан бастап вешенка саңырауқұлағын өсірумен айналыса бастаған. Ол үшінші топтағы мүгедек болса да бір сәтке де еңбек етуден тыңбаған. Бүгінде жеңсік астың бірі болып саналатын саңырауқұлақ Павлодар қаласының көптеген мейрамханалары мен дәмханаларының ас мәзіріне енген.
Ақбота Сейсенбаева
Фото: hutir.org
