Халықаралық байқауда жүлде алған павлодарлық оқушылардың саны екі есеге артты

Zakon.kz

Өткен жылы павлодарлық оқушылар тек төрт жоба бойынша үш орынға ғана ие болса, биылғы жылы жеңімпаздар саны екі есеге артқан.

Алматы қаласында Әль-Фараби атындағы Қазақ ұлттық университетінің механика-математикалық факультетінде өткен Ө.Жолдасбеков атындағы VI халықаралық байқаудың қорытындысы бойынша сегіз ғылыми жобаның авторы жүлделі тоғыз орынға ие болды. Оның біреуі - алтын, үшеуі - күміс, бесеуі – қола, деп хабарлайды pavlodarnews.kz.

Өңірлік қосымша білім беру оқу-әдістемелік орталығы ұсынған ақпаратқа сүйенсек, Павлодар облысы командасының құрамына республикалық ғылыми жобалар конкурсының қорытынды және облыстық кезеңдерінің 13 жеңімпазы мен жүлдегері енген. - Конкурсқа Қазақстанның барлық аймағынан және Тәжікістан, Грузия, Қырғызстан, Әзірбайжан елдерінен 224 жобамен 11-сыныпта білім алатын 250 оқушы қатысты.

Аталмыш білім додасында 1-орынды «Жергонна және Нагель Чевиандары» атты жобасымен дарынды балаларға арналған № 8 лицей-мектебінің оқушысы Мұса Әкежан, 2-орынды «Графалардағы метрикалар» жобасымен облыстық дарынды балаларға арналған көп салалы лицей-интернатының оқушылары Олжабай Алмаз және Айнұр Уән, «Жетілуге жуық сандар» жобасымен Екібастұз қаласының дарынды балаларға арналған №1 лицей-мектебінің оқушысы Накия Бердиева иеленді.

Сондай-ақ «Жас дарын» мамандандырылған мектебінен Әбу Арыстан және Айдар Ускембаев, Павлодар қаласының №9 гимназия-мектебінен Анель Алдабергенова, дарынды балаларға арналған №3 гимназиясынан Дамир Кокишев, Екібастұз қаласы №26 мектеп-гимназиясынан Малика Айтжанова жүлдегерлер қатарынан орын алды, - дейді орталық директорының орынбасары Азамат Шаймұрат.

Айта кетерлігі, өткен жылы павлодарлық оқушылар тек төрт жоба бойынша үш орынға ғана ие болса, биылғы жылы жеңімпаздар саны екі есеге артқан.

Фото:pavlodarnews.kz