Cырбойылық өрендер ұлттық спорт түрлері бойынша сайысқа түсті
Zakon.kz
Тұран ойпатында орналасқан Қызылорда өңірінде төл спорттың мерейін үстем еткен шара ұйымдастырылды. Әз Наурыздың қарсаңында 100-ге тарта сырбойылық өрендер «Сыр сүлейлері» аллеясына жиылып, ұлттық спорт түрлері бойынша сайысқа түсті, деп хабарлайды 24.kz арнасы.
Білегі мықтылар арқан тартысып, қол күрестірді. Сақасын сайлап шиырған жеткіншектер асық ату жарысының көркін қыздырды. Ал есепке жүйрік жастар жағы тоғызқұмалақ ойнап, ой ұтқырлығы бойынша сынасты. «Бұл шара өскелең ұрпақты отансүйгіштікке тәрбиелеп, достық пен татулықты паш етуге бағытталған», - дейді ұйымдастырушылар.
«Бұл шара наурыздың 22-сіне дейін созылады. Ертеңгі күні үлкен Ақмешітте осындай спорттық шаралар өтеді. Одан кейін Қорқыт баба ескерткішінің жанында 18-19 күндері болады. 21 наурыз күні орталық алаңда, 22күні де ары қарай жалғасын тауып, спорттық және мәдени шараларды бірлесіп өткіземіз»,- дейді қалалық дене шынықтыру және спорт бөлімінің басшысы Асылжан Жаманқұлов.
Фото:24.kz
