Түркияда «Қазақ елі» журналы жарық көрді
Zakon.kz
Қазақ және түрік баспасөзі «Қазақ елі» деп аталатын басылыммен толықты. Жаңа журнал Ыстамбұл қаласында Түркиядағы қазақ диаспорасының қолдауымен жарық көрді. Оның алғашқы саны 2500 данамен қазақ және түрік тілдерінде басылып шығып, өз оқырмандарына жол тартты, деп хабарлайды 24.kz телеарнасы.
«Журнал түркі әлемі мен Қазақстан жайлы мол мағлұмат беріп, қазақ халқының тарихы мен мәдениетін кеңінен насихаттауды көздеп отыр», - дейді «Қазақ-түрік білім және зерттеу» қауымдастығының төрағасы Серкан Динчтүрік. Атап өту керек, басылымның алғашқы санында Еуразия университеті журналистика мәселелерін зерттеу институтының директоры Намазалы Омашевтың, Қазақстанның Түркиядағы елшісі Жансейіт Түймебаев пен Еуразия түрік қауымдастығы федерациясының төрағасы Исмаил Дженгиздің көлемді мақалалары жарияланған.
Серкан Динчтүрік, «Қазақ-түрік білім және зерттеу» қауымдастығының төрағасы:
«Қазақ елі» журналымызда Қазақстаннан жіберілген мақалалар мен осы жерде тұрған білімді, көзі қарақты азаматтардың да мақалалары бар. Жоспарымыз – Түркиядағы қандастарымыз бен Қазақстаннан келген бауырларымызға жан-жақты қолдау көрсету. Журналды Қазақстан мен Түркия арасындағы байланыстарды тереңдету мақсатында жарыққа шығардық.
Фото:24.kz
