Павлодарда сәбилер үйіндегі балалардың 75 пайызын әлеуметтік жетімдер құрайды

Zakon.kz

Статистикалық мәліметтерге сүйенсек, 70 жылдық тарихы бар сәбилер үйіне 2014 жылы 120 бала, 2015 жылы 149 бала және биыл 128 бала қабылданған.

Павлодар облыстық сәбилер үйіндегі балалардың 75 пайызын әлеуметтік жетімдер құрайды, деп хабарлайды pavlodarnews.kz.

Бұл туралы агенттіктің жолдаған ресми сауалына берген жауабына облыстық денсаулық сақтау басқармасының басшысы Нұрлан Қасымов мәлім етті.

- Бүгінгі таңда сәбилер үйінде 72 бала бар. Мұнда жарық дүние есігін ашқан балғындар төрт жасқа дейін, ал мүмкіндігі шектеулі балалар бес жасқа дейін тұрады. Олардың басым бөлігі, 75 пайызы - әлеуметтік жетімдер. Яғни, мұндай балалардың биологиялық ата-аналары бар болғанмен, олардың ата-ана құқықтарына шектеу қойылады. Дегенмен көп жағдайда жалғызбасты аналар сәбилерін тастап кетеді. Сондай-ақ, кейбіреулері тұрғын үй мен баланы асырау үшін қаражаттың жоқтығына, туыстары тарапынан қолдаудың болмауына байланысты және нәрестенің бойында туа біткен ауытқу болған жағдайда бауыр еті баласынан бас тартып жатады, - деп жазылған Нұрлан Қасымовтың жауабында.

2016 жылы тоғыз айдың ішінде 24 баланы ата-анасы қайтарып алған. Сондай-ақ, 2015 жылы 10 бала, биылғы жылы төрт бала асырап алынған болса, 14 бала патронаттық және қамқоршы отбасыларға тапсырылған.

Ақбота Сейсенбаева

Фото: Рavlodarnews.kz

Читайте также