Таразда «Тәуелсіздік. Елбасы. Мәңгілік ел!» атты жастар форумы өтті

Тараз мемлекеттік педагогикалық институтында «Тәуелсіздік. Елбасы. Мәңгілік ел!» атты Жамбыл облыстық жастар форумы өтті. Бұл туралы zakon.kz ТарМПИ-дың Ақпараттық-имидждік қызметі берген ақпаратқа сілтеме жасап хабарлайды.

Қазақстан Республикасының Тұңғыш Президенті күніне орай өткізілген жиынға жоғары оқу орнының 1000-ға жуық студенті, түрлі деңгейдегі мәслихат депутаттары және үкіметтік емес ұйым мүшелері қатысты.

Бүгінде ұлт көшбасшысының биік саяси бейнесі, зор тарихи тұлғасы ұлтымен ажырамас егіз ұғымға айналды. Елбасының сындарлы саясаты арқасында елімізде әлеуметтік-экономикалық және қоғамдық-саяси реформалар табысты жүзеге асып, Қазақстанды жаңа ғасырдағы бәсекеге қабілетті мемлекет ретінде әлемге паш етті. Жиынның алға қойып отырған мақсаты да осы. Елбасы Нұрсұлтан Назарбаевтың өмірі мен қызметі, өскен-өнген, оқыған ортасы, тәуелсіз Қазақстан мемлекетін қалыптастырып, дамытудағы ерен еңбегін насихаттау. Қолдау көрсету.

Форумды Тараз мемлекеттік педагогикалық институтының ректоры Дария Қожамжарова кіріспе сөзбен ашып, шараның мәні мен маңызына кеңірек тоқталды.

– 2011 жылғы 14 желтоқсанда Мемлекет басшысы – Елбасы Нұрсұлтан Әбішұлы Назарбаев 1 желтоқсанда аталып өтілетін жаңа мемлекеттік һәм бүкілхалықтық мереке – Қазақстан Республикасының Тұңғыш Президенті күнін белгілейтін Заңға қол қойды. Бұл – егемен еліміздің жаңа тарихындағы ерекше күн. Бұл – бүгінде ұлт көшбасшысының биік саяси бейнесі, зор тарихи тұлғасы ұлтымен ажырамас егіз ұғымға айналғандығының айқын көрінісі. Бұл – Елбасының сындарлы саясаты арқасында елімізде әлеуметтік-экономикалық және қоғамдық-саяси реформалар табысты жүзеге асып, Қазақстанды жаңа ғасырдағы бәсекеге қабілетті мемлекет ретінде әлемге паш етуінің тағы бір айқындала түсуінің нышаны. «Кемел елдің келешегі жастар», – деп білетін Елбасы жастарға, яғни Сіздерге үлкен сенім артып отыр. Сіздердің басты құндылықтарыңыз «тәуелсіздік» болуы керек. Алаштың ардақты перзенті, айтулы ақын Мағжан Жұмабаев «Арыстандай айбатты, Жолбарыстай қайратты» деп әспеттеген бүгінгі ұрпаққа еліміздегі ырысты ынтымақ пен тату тірлікті қастерлейтін үлкен жауапкершілік жүктеліп отыр. «Отанды сүй, елге қызмет ет» деген Елбасы өсиеті де осыған саяды, – деді Дария Пернешқызы.

Бұдан өзге форум барысында «Қазақстан – Тараз» телеарнасының директоры, Жамбыл облыстық мәслихатының депутаты Мейрамбек Төлепберген, Жамбыл облыстық Қазақстан халқы Ассамблеясы хатшылығының меңгерушісі Маржан Қожаева, Тәуелсіздік құрдасы, Тараз қалалық мәслихатының депутаты Серікбол Берікқожа, Жамбыл облыстық Кәсіподақ ұйымының төрайымы Гүлсін Орынбаева, ТарМПИ-дың Тарих және әлеуметтік педагогика факультетінің деканы Зағира Тоқбергенова және ТарМПИ-дың Студенттік ректоры, Физика-математика факультетінің 2-курс студенті Диас Бәйдібек сөз сөйлеп, айтулы датаның ауқымдылығына тоқталып, еліміздегі мемлекеттік жастар саясатының жүзеге асырылуы мен облыс жастарының өзге де мәселелерін айтты.

Форум жастардың кәсіби дамуына, прогресшіл жасампаздармен толықтыруына, шығармашылықпен ойлай алатын жетекшілер жасақтауға қызмет етеді. Форум алдағы уақытта жаңа ойлармен, тәжірибелер алмасудың алаңы болып қала береді.

Шара барысында Тараз мемлекеттік педагогикалық институтының «Жібек жолы» халықтық-эстарадалық оркестрі, «Көне Тараз» фольклорлық-этнографиялық, «Томирис» және «Салтанат» секілді би ансамбльдері сынды өнер ұжымдарының қатысуымен мерекелік концерт ұйымдастырылды. Сондай-ақ, Елбасы Н. Назарбаевқа арналған «Дана тұлға – дара тұлға» атты кең көлемді ашық кітап көрмесі көпшілік назарына ұсынылды.