Қарағанды полициясы күре жолда болған қарулы қарақшылық қылмыстың ізін суытпай ашты

Zakon.kz

Күдіктілер уақытша ұстау оқшаулағышына қамалды.

Қарағанды облысының полицейлері қала сыртындағы күре жолда болған қарақшылық шабуылдың бетін ашты, деп хабарлады «ҚазАқпарат» ХАА.

«Шет ауданының ІІБ кезекші бөліміне Батық ауылынан 15 шақырым жерде Қарағанды-Жезқазған жолында үш белгісіз адамның жүк көлігіне қарақшылық шабуыл жасағаны жайлы ақпарат түсті. Олар жүргізушіні қарумен қорқытқан. Көлік фирмалардың бірінікі болып шықты», - деді ІІД баспасөз қызметінің басшысы Бақытжан Құдияров.

Қылмыскерлер 400 мың теңгені қолды етіп, бой тасалаған. Аталмыш факті бойынша ІІО барлық жеке құрамы жұмылдырылды. Жедел-іздеу шаралары барысында полиция қызметкерлері күдіктілер жасырынған көлікті анықтады. «12 сағаттан соң Атасу кентінде «ВАЗ-2107» көлігі ұсталды. Оның ішінде 24 жастағы жүргізуші, 24 және 26 жастағы жолаушы болған. Жауап алу барысында олар қылмыстарын мойындады. Заттай дәлел - қару, ақша тәркіленді», - деді Б. Құдияров.

Күдіктілер уақытша ұстау оқшаулағышына қамалды. ҚК 192-бабы 2-бөлігі бойынша соталды тергеу жүріп жатыр.

Фото: inform.kz

Читайте также